Shqipëria ka parapaguar për 1 milionë e 140 mijë doza të vaksinave anti COVID të siguruara me anë të programit COVAX. Kështu ka deklaruar ministrja e Shëndetësisë, Ogerta Manastirliu e ftuar në emisionin Log në Abc. Ministrja ka thënë se në programin COVAX janë parapaguar doza për 20% të popullsisë.
“Qeveria shqiptare prej muajsh është në përpjekje për të siguruar vaksinën. Të gjithë e dimë që sot është arma më e kërkuar në botë dhe po ashtu e dimë edhe përpjekjen e qeverisë për të siguruar vaksinat kur në rajon ende nuk kishin filluar përveç Serbisë. Covax është një instrument që t’i do të parapaguash që të kesh.
Ne me Covax kemi parapaguar për 20% të popullatës. Janë 1 milion e 140 mijë doza që i kemi të siguruara me Covax. Ne kemi siguruar një mbulesë për 800 mijë qytetarë, pra me 1 milion e 600 mijë doza vaksinash. Për vaksinën asnjë vend nuk ka vënë si opsion paranë, por duhet të kuptojmë që vetëm disa shtete kanë parapaguar 70% të prodhimit të vaksinave për vitin 2021″, tha Manastirliu.
Ministrja nuk ka dhënë detaje për llojin e vaksinës apo çmimin e një doze, por vetëm ka bërë të ditur që janë parapaguar 4 milionë dollarë.
“4 milion dollarë që janë paguar, janë parapagim për blerjen e 1 milion e 140 mijë dozave”, deklaroi Manastirliu..
E pyetur se sa ka kushtuar një dozë e vaksinës Pfizer, Manastirliu nuk ka pranuar ta tregojë, ndërsa gazetarja i ka marrë për referencë Amerikën që e ka blerë 15 dollarë një dozë dhe e ka bërë publike.
“Jo nuk mund ta themi. Nuk mund ta themi për arsye të një marrëdhënie serioziteti dhe ligjore që kemi me kompaninë”, tha Manastirliu.
