Belind Këlliçi komentoi protestën e djeshme para Kuvendit të Shqipërisë, ku u kërkua dorëheqja e kryeministrit Rama. Ai theksoi se protesta u nxit nga një dokumentar i RAI3 dhe një editorial i gazetës gjermane Bild, që pasqyrojnë lidhjet e Ramës me krimin. Këlliçi tha se “në një vend normal, Rama do të jepte sqarime shteruese për skandalet e fundit që kanë përfshirë qeverinë”.
Lidhur me vizitën e kryeministres italiane Giorgia Meloni në Shqipëri, Këlliçi vuri në dukje se kjo vizitë ishte për interesa politike të qeverisë italiane dhe partisë së Melonit për zgjedhjet evropiane. Ai shtoi se Rama foli italisht gjatë konferencës për shtyp, duke e cilësuar këtë si një mënyrë për të mbështetur Melonin në zgjedhjet evropiane.
Këlliçi deklaroi: “Protesta ka ndodhur për shkak të dokumentarit të RAI3 dhe editorialit të Bild, ku pasqyrohen lidhjet e Ramës me mafian shqiptare dhe persona me rekorde kriminale. Ky reportazh vjen nga media shtetërore italiane dhe nga një gazetar që nuk mund të shantazhohet lehtësisht nga kryeministri.”
Ai shtoi se “Shqipëria drejtohet nga një kryeministër i korruptuar dhe në çdo vend normal të botës, kur zv/kryeministri është në arrati dhe thotë se është përballur me kërcënime, kryeministri do të jepte sqarime shteruese”.
Këlliçi përmendi edhe protestat e fundit para bashkisë së Tiranës dhe Parlamentit, duke theksuar se opozita është e angazhuar në terren dhe në përgatitjen e programit elektoral për zgjedhjet e ardhshme.
