Prej disa ditësh ish-kryeministri i vendit, Sali Berisha ndodhet në ‘arrest shtëpiak’ pas masës së dhënë nga GJKKO, pasi akuzohet për korrupsion pasiv për çështjen e privatizimit të ish-klubit sportiv Partizani.
Por, cilat janë detyrimet dhe të drejtat e Berishës që ka lidhur me këtë masë sigurie?
Për të folur mbi këtë çështje ishte i ftuar avokati i tij, Genc Gjokutaj në Opinion, ku ka treguar detaje për vendimin në fjalë. Ai tha se në banesën e ish-kryeministrit nuk ka policë dhe se nuk ruhet nga forcat e policisë.
Po kush mund ta takojë zotin Berisha?
“Komunikimi i zotit Berisha ka dy funksione, si person nën hetim, por edhe si politikan. Ai në këtë cilësi ka detyrim për komunikimin siç po e realizon. Ai nuk po takon ekspertë apo dëshmitarë që t’i intimidojë”, tha Gjokutaj.
Genc Gjokutaj tha ndër të tjera se ai mund të takojë edhe persona të partisë së tij, gazetarë, të cilët duhet të marrin leje autorizimi për të takuar Berishën. Avokati u shpreh se zoti Berisha mund të komunikojë edhe përmes rrjeteve sociale.
Lidhur me paraqitjen e tij si deputet në Parlament, nëse do që të shkojë Gjokutaj tha se ai duhet të lajmërojë SPAK-un, në mënyrë që të mos humbë mandatin për mosparaqitje në seancat plenare për njëkohë të gjatë.
