Një lajm i rëndësishëm dhe i gëzuar ka ardhur për trashëgiminë kulturore shqiptare! Tradita e njohur si “K’cimi i Tropojës” është shpallur zyrtarisht pjesë e Listës Përfaqësuese të Trashëgimisë Kulturore Jomateriale të Njerëzimit nga UNESCO.
Ky vendim u mor pas një vlerësimi pozitiv nga Organizmi i Vlerësimit të UNESCO-s, gjatë sesionit të 19-të të Komitetit Ndërqeveritar për Ruajtjen e Trashëgimisë Kulturore Jomateriale, që u mbajt në Asuncion, Paraguaj.
“K’cimi i Tropojës”, një traditë që lidhet ngushtë me kulturën e Tropojës, është tani pjesë e një liste prestigjoze që përfshin pasuritë kulturore jomateriale më të rëndësishme të botës.
“K’cimi i Tropojës” do të kontribuojë në njohjen dhe promovimin e kulturës shqiptare në një nivel ndërkombëtar, duke e bërë më të njohur dhe më të vlerësuar pasurinë kulturore të vendit.
Ky sukses pason edhe arritje të tjera të Shqipërisë në fushën e trashëgimisë kulturore, duke theksuar angazhimin e vazhdueshëm për ruajtjen dhe promovimin e elementeve të kulturës jomateriale që kanë një vlerë të madhe për njerëzimin.
