Komisioni i Ankesave dhe Sanksioneve ka pranuar kërkesën e LSI për hapjen e 108 kutive të votimit në Durrës. Vendimi u mor duke u nisur nga analogjia e këtij rasti me rastin e Beratit.
“Nisur nga analogjia e këtij rasti me rastin e Beratit dhe dakordësia e palëve, KAS vendos të pranojë kërkesën e LSI-së për rinumërimin e 108 kutive të votimit”, tha Koli Bele, drejtuesi i seancës së sotme.
Ndërkohë, Altin Kaziaj, përfaqësuesi i LSI në KAS, tha se kërkesa e LSI ka 8 fletë dhe në brendësi ka argumenta për vendimmarrje objective. Më tej ai tha se në pamjet e kamerave në 300 QV, shihen numëruesit që vinin dorën tek subjekti dhe e mbanin fletën e votimit ashtu siç parashikohet në manualin përkatës.
“Me lejen tuaj po relatoj. Sapo u shprehët për një kërkesë të ngjashme. Ne kemi bërë kërkesë duke vënë në lëvizje, kërkojmë vendimin për miratimin e tabelës përmbledhëse. Kërkojmë si në qarkun e Beratit, rinumërimin dhe rivlerësimin e votave për të gjitha ZAZ-të. E keni këtë kërkesë. Ka 8 fletë kërkesa. Në brendësi keni argumenta për vendimmarrje objektive. Struktura e kësaj kërkese është e njëjtë me qarkun e Beratit. Në bazë të gjetjeve të LSI-së nëpër VNV e kamerave në 300 QV. Numëruesit me qëllim apo jo vinin dorën tek subjekti dhe shpesh herë nuk e mbanin fletën e votimit ashtu siç parashikohet në manualin përkatës. Nga kjo tabelë më konkretisht PS ka 204 vota më tepër, ndërsa LSI 136 vota dizavantazh. Është element shtesë që e përdorim për besueshmërinë e kërkesës tonë ankimore”, tha Kaziaj.
