Komisioni i Ankesave dhe Sanksioneve pranoi ditën e sotme kërkesën e Partisë Socialiste në lidhje me fletën e votimit, pëer të renditur kandidatët për deputetë me numra dhe jo me emra. KAS rrëzoi kështu kërkesën e PD për fletën e votimit me emra, e cila u miratua më parë nga KQZ.
“Ky vendim hyn menjëherë në fuqi dhe publikohet në faqen zyrtare të KQZ-së. Për këtë vendim mund të bëhet ankimim.”, tha përfaqësuesi i KAS.
Por Partia Demokratike nuk ka qenë aspak dakord me vendimin dhe ka deklaruar se do e apelojë. Përfaqësuesi i PD, Ivi Kaso ka thënë se Rama është i turpëruar e nuk do që njerëzit të shohin për kë po votojnë.
“Është shumë e qartë se çfarë është duke bërë Rama, ai e kupton që do të humbasë është shumë e qartë që do të manipulojë me çështjen e logos, vendimi i sotëm është në kundërshtim me ligjin, shiheni dhe çfarë po përpiqen të bëjnë. Ne do ta apelojmë vendimin e sotëm. Rama është i turpëruar, ai nuk do që njerëzit të shohin se për kë po votojnë. U bëj apel që të kenë kujdes sepse po i fsheh për publikun. Ne do ta apelojmë këtë vendim. Ajo që ai bën është përpjekja për të votuar zgjedhjet me lojërat e tij të pista. Shqiptarët e dinë dhe janë të ngopur me marifetet e ndyra. Të hedhim poshtë mashtrimet për të luajtur zgjedhje demokratike”,- tha Kaso.
