Kapet i shumëkërkuari për trafikim të lëndëve narkotike në zonën e 21 dhjetorit. Bashkëpunim me forcat “Shqiponja”

Policia ka arrestuar një 43-vjeçar, i cili kërkohej për trafikimi ndërkombëtar të lëndëve narkotike.

Për arrestimin e tij është dashur ndërhyrja e Forcës së posaçme “Shqiponjat” dhe Patrullës së Përgjithshme.

Kapja e 43-vjeçarit është bërë në rrugën “Muhamed Gjollesha”, në zonën e 21 dhjetorit.

Ndaj tij rëndojnë një sërë akuzash, si: “Prodhimi dhe shitja e narkotikëve”, “Grup i strukturuar kriminal”, dhe “Kryerja e veprave penale nga organizata kriminale dhe grup i strukturuar kriminal”.

Materialet i kaluan Prokurorisë se Posaçme Kundër Korrupsionit dhe Krimit te Organizuar, Tiranë.

Njoftimi i plotë

Tiranë

Një tjetër i kërkuar, pjesë e një grupi të strukturuar kriminal bie në prangat e Policisë.

Kapet dhe ndalohet një 43 vjeçar i kërkuar për trafikim ndërkombëtar të lëndëve narkotike.

Në kuadër të planit të posaçëm të masave për garantimin e rendit e sigurisë para, gjatë dhe pas natës së ndërrimit të viteve, mbajtjen nën kontroll të situatës, parandalimin dhe goditjen e veprimtarisë kriminale, kapjen e personave që qarkullojnë me armë zjarri dhe ata në kërkim, Seksioni për Hetimin e Narkotikëve në D.V.P Tiranë, në bazë të informacionit të marrë në rrugë operative, në rrugën “Muhamed Gjollesha”, në bashkëpunim me Forcën e posaçme “Shqiponjat” dhe Patrullën e Përgjithshme kapën dhe ndaluan shtetasin e shpallur në kërkim:

G. R, 43 vjeç, banues në Tiranë, pasi ishte i shpallur në kërkim për trafik ndërkombëtar lëndësh narkotike.

Për ketë shtetas Gjykata e Shkalles se Pare për Krime te Renda më datë 18.12.2019, ka caktuar masën e sigurimit personal “Arrest në burg” për vepra penale “ Prodhimi dhe shitja e narkotikëve”, “Grup i strukturuar kriminal”, dhe “Kryerja e veprave penale nga organizata kriminale dhe grup i strukturuar kriminal”.

Materialet i kaluan Prokurorisë se Posaçme Kundër Korrupsionit dhe Krimit te Organizuar, Tiranë.