Policia e Korçës vijon punën për kapjen emigrantëve të paligjshëm. Sipas informacioneve të marra mësohet se operacioni i policisë po zhvillohet në qytet dhe në disa fshatra të saj.
Pas fshatit Drenovë policia ka bërë të mundur kapjen e 35 emigrantëve të paligjshëm në fshatin Mborje. Mes emigrantëve ka gra dhe fëmijë mosha e të cilëve shkon deri 3 muajsh. Për shkak të rrugës së gjatë dhe të vështirë që kanë kryer emigrantët policia transportoi për kontroll fëmijën 3 muaj në spitalin rajonal të Korçës ndërsa të tjerët në drejtorinë e kufirit për veprime të mëtejshme procedurale. Mësohet se policia i gjeti emigrantët në një tunel në fshatin Mborje. Kujtojmë se pak orë më parë u gjet një furgon i mbushur me emigrantë të paligjshëm. Shoferi, kishte braktisur mjetin në rrugë dhe është larguar, ndërsa policia i është vënë në ndjekje. Nga informacionet e marra mësohet se drejtuesi i mjetit, sapo ka pikasur prezencën e policisë është larguar menjëherë nga vendi i ngjarjes, duke e lënë në mjet të gjithë emigrantët që po mundohej t’i transportonte drejt kryeqytetit. Policia e Korçës ka bërë të mundur identifikimin e drejtuesit të mjetit ndërkohë që po punon për kapjen e tij. Nga ana tjetër emigrantët e paligjshëm janë transportuar në drejtorinë e kufirit për procedura të mëtejshme.
