Dy persona janë kapur në flagrancë në pikën kufitare të Kpashticës, pasi tentuan të kalonin në kufirin grek 1.3 kilogramë kokainë.
Personat e arrestuar janë shtetasi me iniciale I. F., 40 vjeç, dhe pasagjer shtetasin B. H., 49 vjeç, të dy banues në Korçë.
Ata po lëviznin me një automjet tip “Mercedes-Benz” dhe pasi iu nënshtruan kontrolleve të policisë, 40 vjeçarit iu gjend 1 kilogram kokainë që e kishte fshehur në trup, ndërsa pjesa tjetër ishte e fshehur në makinën që ata po udhëtonin.
Ata janë shoqëruar në polici dhe tashmë pritet të merret masa ndaj tyre për veprën penale “Trafikimi i narkotikëve, kryer në bashkëpunim, mbetur në tentativë”.
NJOFTIMI I PLOTË:
Kapshticë
Masat e shtuara nga Policia Kufitare dhe shkëmbimi i informacionit me Seksionin për Hetimin e Narkotikëve në DVP, çuan në parandalimin dhe goditjen e një tjetër tentative për trafikim të drogave të forta.
Tentuan të trafikonin kokainë drejt Greqisë, nëpërmjet Pikës së Kalimit Kufitar Kapshticë por bien në prangat e Policisë Kufitare dy autorët.
Sekuestrohet 1 kilogramë e 28 gr lëndë e dyshuar narkotike kokainë.
Shërbimet e Stacionit të Policisë Kufitare Kapshticë, në zbatim të planit të posaçëm të masave për rritjen e kontrollit me qëllim parandalimin, evidentimin dhe goditjen e tentativës për trafikim të lëndëve narkotike, si dhe në bazë të analizës së riskut, dhe shkëmbimit të informaciomeve me Sektorin për Hetimin e Narkotikëve, kanë përzgjedhur për kontroll të imtësishëm në vijën e dytë, automjetin tip “Mercedes-Benz” me drejtues shtetasin I. F., 40 vjeç dhe pasagjer shtetasin B. H., 49 vjeç, të dy banues në Korçë.
Pas verifikimeve dhe kontrollit të ushtruar në automjet, punonjësit e Policisë Kufitare kanë vijuar me kontrollin fizik ndaj dy shtetasve të lartpërmendur.
Si rezultat i kontrollit fizik, shtetasit B. H., i është gjetur e fshehur në trup një pako e presuar me lëndë të dyshuar narkotike e llojit kokainë me peshë 1028.2 gr, sasi e cila iu sekuestrua në cilësinë e provës materiale.
Veprimet e mëtejshme procedurale dhe hetimore, u kryen nga specialistët e Seksionit për Hetimin e Narkotikëve pranë DVP Korçë, të cilët bënë arrestimin në flagrancë të shtetasve të sipërpërmendur për veprën penale “Trafikimi i narkotikëve, kryer në bashkëpunim, mbetur në tentativë”.
