Pandemia e covid-19, ka krjuar një gjendje kaotike në sistemin shëndetësor shqiptar. Si pasojë qytetarët janë të frikësuar dhe në ankth kur shkojnë në ambjentet spitalore për tu kuruar për sëmundjet e ndryshme nga të cilat vuajnë.
Mirëpo ankthin më të madh po e kalojnë pacientët me covid-19 dhe të afërmit e tyre.
Me anë të disa fotove të siguruara nga agjensia fotografike LSA, shihet qartë se si situata në spitalet covid nuk po menaxhohet siç duhet dhe se nuk ka një rregull për të gjithë të afërmit e pacientëve me koronavirus, që presin plot ankth në oborrin e QSUT-së, pranë Infektivit për tu interesuar për të afërmit e tyre.
Në foto galerinë e LSA-së, shikohet se si të afërmit e pacientëve me covid-19 sjellin me vete qese me ushqime për të afërmit e tyre pacientë që janë brenda. Në pamje paraqitet një infermier i cili i merr qeset e të gjithëve dhe ua shpërndan më pas brenda pacientëve përkatës.
Gjithashtu fotografët kanë kapur pamje edhe gjatë momenteve kur pacientë mbërrijnë në gjendje të rëndë në Spitalin Infektiv ose i quajtur ndryshe Spitali Covid 1 dhe momentin kur infermierët transportojnë nga ambulanca së bashku me bombolën e oksigjenit pacientin nga ambulanca e cila ka pritur në radhë për tu liruar ndonjë krevat.
Kujtojmë se Ministria e Shëndetësisë me anë të një njoftimi zyrtar, ka bërë me dije se gjatë 24 orëve të fundit kanë humbur jetën 17 persona si pasojë e covid-19. Gjithashtu janë kryer 1963 testime nga të cilat 695 kanë rezultuar pozitivë, një numër më i reduktuar se dje.
Aktualisht në 4 spitalet COVID, po trajtohen 463 pacientë, 37 në terapi intensive, 9 pacientë janë të intubuar./Gazetareforma.com/
