Deputeti i Partisë Demokratike, Gazment Bardhi ka folur për mediat pas përfundimit të seancës së sotme parlamentare. Ai e quajti të paligjshme pasi në më pak se 5 minuta nisi, u votua, dhe përfundoi seanca.
Sot opozita vijoi aksionin e saj në Kuvend, duke hedhur tymuese, ç’ka solli edhe në mbylljen e senacës, pasi u votua buxheti 2024 nga deputetët e maxhorancës.
Ndërkohë, Bardhi tha se opozita nuk do lejojë punimet normale të Kuvendit, duke thënë se ky institucion është futur në paligjshmëri.
“Sa i përket betejës së opozitës, ne do ta vazhdojmë në Kuvend. Nuk do lejojmë punimet normale të Kuvendit. 4 minuta e 29 sekonda plenare, do të thotë që Kuvendi është futur në paligjshmëri. Në asnjë moment nuk kam deklaruar që do bllokojmë votimin, sepse hajdutët me mandat parlamentari i kanë votat për të miratuar ligjet. Ama beteja jonë është për t’iu treguar çdo qytetari që ky nuk është Parlamenti që i përfaqëson. Do ndjekim edhe hapa të tjerë institucional mbi vendosmërinë tonë”, u shpreh Bardhi.
