Kandidatët që kanë pranuar mandatin nga krahu i opozitës, janë duke u përpjekur të justifikojnë në një mënyrë apo në një tjetër vendimin e marrë.
Këtë herë ka qenë kandidatja e Lëvizjes Socialiste për Integrim në Durrës, Edlira Hyseni, e cila ka thënë arsyet e saj pse pranoi marrjen e mandatit.
Nëpërmjet një statusi në rrjetin social, Facebook, Hyseni ka thënë se ai që ka ndikuar në vendimin e saj ka qenë djali 19-vjeçar.
“Ti mam, duhet ta pranosh atë mandat, sepse partitë i bëjnë njerëzit e kush të njeh, e di se ti zgjedh me zemër, se ti ke ngritur një jetë mbi punën” – më tha Kevin, im bir, vetëm 19 vjeç. Kevin më tregoi edhe këtë herë, se fëmijët tanë janë një brez i bukur, mbushur plot besim e shpresë, një brez që meriton të zgjedh të ardhmen e tij në Shqipëri! Po, unë do ta pranoj mandatin për deputete të Qarkut Durrës në Kuvendin e Shqipërisë, që mbase rastësia a mbase diçka më shumë e solli si mundësi reale në udhën time”, ka shkruar ajo.
Edlira Hyseni gjithashtu shkruan se do ta pranojë mandatin për të dhënë sado pak shpresë, por paralajmëron se gjithsesi do të jetë në opozitë me qeverinë.
“Uroj t’ju kem krahë e mbështetje, përtej çdo ngjyre apo bindje politike, siç keni qenë përherë në përpjekjet e mia, për një jetë më të mirë në qytetin që duam, në këto 4 vite përfaqësie në Këshillin Bashkiak të Durrësit. Dhe … Opozitare kam lindur, politikane s’e di ende”, ka shkruar Hyseni.
