Kandidatja e LSI për Durrësin, Elona Guro ka mohuar të ketë pasur një sherr ku ajo ka qenë e përfshirë ditën e sotme. Në një prononcim për ABC Neës Guri ka thënë se ajo ka shkuar vetë në polici ku ka bërë një denoncim për vëzhgim dhe kërcënim të njerëzve që hyjnë në zyrat e LSI. Ajo ka thënë se nuk kanë pasur asnjë njoftim për instalimin e pajisjes dhe i kanë kapur njerëzit që donin ta instalonin në flagrancë.
“Unë kam shkuar kam bërë vetë një denoncim. Një kallëzim për vëzhgimin monitorimin dhe kërcënimin e njerëzve që besojnë dhe hyjnë në zyrat e LSI. Jo nuk kemi pasur njoftim, i kemi kapur vetë në flagrancë. Sepse kishim kohë që dëgjonim njerëzit tanë që i kërcënonin, intimidonin pse hynin dhe dilnin në LSI. I kanë mbajtur në vëzhgim dhe monitorim mafia e plehrave dhe rilindjes që kanë kapitulluar zgjedhjet e 25 Prillit Nuk e kanë vënë në zyrë por jashtë zyrave. Policia të hetojë dhe të monitorojë çdo akt kriminal që kërcënon jetët e çdo individi që beson në LSI”, tha Guri.
E pyetur nëse është në dijeni të emrave të personave që kanë dashur t’i instalojnë pajisjet ajo ka thënë se janë 10 hapa para Policisë së Shtetit, ndërsa ka bërë thirrje që kjo çështje të zbardhet, ndërsa nuk ka pranuar të japë emra konkretë.
“Jemi 10 hapa para policisë së Shtetit që është bërë një me rilindjen dhe është në funksion të rilindjes. Nëse ata duan të bëjnë shtet, të zbardhin çështjen dhe të fusin në burg këtë akt criminal Ata janë sepse e kanë kuptuar vetë. E dinë urrejtjen që kanë shqiptarët për ta. Emra konkretë le t’i thotë policia dhe prokuroria. Nëse ata nuk e zbardhin çështjen do dal unë të flas me emra dhe me fakte”, vazhdoi Guri.
Guri e ka mohuar të jetë konfliktuar fizikisht me një person, por sipas saj thjesht ka denoncuar vendosjen e kamerave.
“Nuk jam konfliktuar fare, thjesht kam denoncuar vendosjen e kamerave. Nuk ka pasur asnjë sherr, jo ,jo”, përfundoi ajo.
