Komisioni i Pavarur i Kualifikimit ka shkarkuar nga detyra Prokurorin e Tiranës, Ndini Tavani.
Ky i fundit ishte edhe kandidat për Strukturën e Posaçme kundër Korrupsionit dhe Krimit të Organizuar.
Trupa gjykuese përbëhej nga Roland Ilia, Alma Feskaj dhe Brunilda Bekteshi.
Vendimi është marrë me shumicë votash, pasi njëri prej anëtarëve ka qenë kundër shkruan “Balkanweb”.
Komisioni konstatoi mospërputhje të deklarimeve të prokurorit për të ardhurat nga puna si avokat, me të cilat ka blerë edhe një apartament në vlerën e 4.5 milion lekëve.
Gjithashtu u konstatuan pamundësi financiare për 2016-ën, vit në të cilin Tavani ka blerë një makinë me vlerë 900 mijë lekë, ka paguar këstin e apartamentit si dhe ka bërë shpenzime për pushime.
Diferencë negative ka rezultuar edhe për vitin 2009, ku prokruroi ka blerë një makinë tip “Benz” për 7 mijë euro.
Në fjalë e tij, Tavani tha se kishte pasur të ardhura të majaftueshme nga avokatia, të ardhurat nga Shkolla e Magjistraturës dhe puna si ndihmës avokat në vitet 2003-2004.
Njëkohësisht për prokurorin e Tiranës Drejtoria e Informacionit të klasifikuar ka hartuar dy raporte, ku i dyti konstatonte papërshtatshmërinë për të vazhduar detyrën. Bëhet fjalë për një dosje për hetimin e disa personave, të cilët akuzoheshin për krijim të skemave mashtruese me TVSH-të.
Prokurori ka hedhur poshtë raportet e DSIK, duke thënë se ky organ kishte informuar në kapërcim me ligjin dhe kjo mund të kuptohet fare mirë në ecurinë e dosjes.
Gjithashtu ndaj tij ka dy kallëzime penale, një në 2013-ën dhe një në 2018-ën. Tavani ka pushuar edhe një çështje në 2017-ën, ku sipas Komisionit, nuk ka mbledhur provat e mjaftueshme.
Prokurori është mbrojtur duke thënë, se Gjykata Kushtetuese ka kërkuar që gjetjet të mos merreshin parasysh në vendim.
