Këshilli i Lartë i Prokurorisë ka nisur intervistat me kandidatët për kreun e SPAK.
I pari në listë ishte Altin Dumani, ndërsa pas tij do të intervistohen Arben Kraja dhe Edvin Kondili.
Dumani garantoi se nëse zgjidhet si drejtues i SPAK, brenda 3 vitesh, rezultatet do të jenë konkrete dhe të prekshme.
Ai gjithashtu shpalosi planin e punës, duke theksuar se do të jetë gjtihmonë në vijën e parë të hetimit.
Dumani shtoi, se do të inkurajojë prokurorët, që të përdorin të gjitha metodat e hetimit.
“Unë do të marrë përgjegjësitë e mia. Drejtuesi ka përgjegjësi për të qenë në vijën e parë të hetimit duke u përballur me cështjet më të rëndësishme. Pa hequr dorë nga funksioni si drejtues, edhe aty ku kam qenë nuk kam hequr dorë nga hetimi. Do të inkurajoj prokurorët të përdorin të gjitha metodat e hetimit” tha ai.
Ndër të tjera Dumani tregoi se për 9 vite ka qenë nën mbrojtjen e policisë, pasi është kërcënuar.
Pavarësisht kësaj prokurori deklaroi se nuk u tërhoq dhe se i ka shkuar gjithmonë dosjeve deri në fund.
Më tej ai zbuloi edhe një pikë të dobët të tijën.
“Te procesi i parë kam shfaqur këmbëngulje pavarësisht rrezikut. Kam qenë 9 vite i mbrojtur nga policia, por nuk jam tërhequr, u kam shkuar gjërave në fund. Një autor vepre penale më ka kanosur dhe është dënuar në të treja shkallët. E kam edhe unë një pikë të dobët, shpesh u kërkoj falje edhe kolegëve, menaxhimi i kohës, se kur më kap grinda për të punuar, harroj elementin kohë. Mirë familja ime, fëmijët, por kam kolegë dhe skuadër dhe ata për hirin tim privohen nga koha që duhet ti kushtojnë familjes” u shpreh Dumani.
