Ka ardhur reagimi i parë nga Kryeministria për lajmin e publikuar në median brtianike The Sun, se në Shqipëri do të ngrihet një kamp për refugjatët që kapen në Angli.
Drejtori i Komunikimit në Kryeministri, Endri Fuga, e ka mohuar diçka të tillë, duke thënë se lajmi është absolutisht i pavërtetë.
“Lajmi se Shqipëria do të ngrejë një qendër azilantësh për llogari të palëve të treta është absolutisht i pavërtetë. Shqipëria hapi dyert për 4 mijë afganë e jemi krenarë për këtë. Ne bëjmë detyrat tona karshi traditës e fëmijëve tanë, jo detyrat e atyre që janë më të mëdhenj e më të pasur se ne”, shkruan Endri Fuga.
“Migrantët që kalojnë Kanalin me anije të vogla nga Franca do të çohen në Shqipëri. Emigrantët e paligjshëm do të fluturojnë 1.500 kilometra në një qendër në det të hapur në Ballkan, ndërsa kërkesat e tyre janë duke u përpunuar”, thuhej në lajmin e publikuar nga The Sun.
Ata citonin burime nga qeveria, duke thënë se Londra dhe Tirana zyrtare ishin afër arritjes së një marrëveshjeje. The Suna shkruan se zyrtarët britanikë duan që diçka të tillë të bëhet e mundur dhe tashmë janë afër përcaktimit të numrave dhe një lokacioni të saktë.
