Prokurorja e Përgjithshme e Përkohshme, Arta Marku ka dalë sot përpara Këshillit të Lartë të Prokurorisë, ku kërkon konfirmimin në detyre.
Ajo është pyetur në lidhje me një takim mesa saj dhe kryeministrit Edi Rama, gjatë kohës së protestave të opozitës.
Marku tha se me Ramën kishte pasur disa takime, për shkak të dhunës që degjeneroi gjatë protestave.
Më tej Marku shtoi se ka qenë një takim pune për shkak të situatës emergjente që po kalonte vendi.
“Takim me kryeministrin nuk kam bërë vetëm një, por disa. Kryeministri drejton disa komisione ku unë jam pjesë. Është e vërtetë, s’ka pasur një takim. Por ju i referoheshit një takimi të fundit që është bërë kur opozita ishte në protesta dhe pati shumë probleme, disa degjeneruan në dhunë dhe kjo ka qenë aryseja jo vetëm me mua por edhe me drejtorin e SHISH, ministrin e Brendshëm, drejtuesit që ishin aktorë që trajtonin cështjet që lindnin nga dhuna e ushtruar në këto protesta prandaj nuk ka qenë takim raportues se s’ka një marrëdhenie të tillë mes ekzekutivit dhe prokurorisë ka qenë një takim pune për shkak të situatës emergjente që po kalonte vendi dhe ne të gjithë e kemi parë e ndjekur nga afër”, tha Marku.
Gjithashtu gjatë intervistës së saj, Marku solli në vëmendje rolin e Prokurorisë në shkarkimin e ish-kryebashkiakut të Vorës, Agim Kajmaku.
Duke qenë se është akuzuar nga opozita, se ishte një zgjedhje e Ramës, Marku përdori rastin e Kajmakut, për të ilustruar pandikueshmërinë e vendimeve të saj.
Ndër të tjera Prokurorja e Përgjithshme e Përkohshme tha se ka vepruar në kushtet e një presioni të madh politik e mediatik.
Ajo shton se ka pasur mbështetjen e faktorit ndërkombëtar si në zgjedhjen, por edhe në vendimet që ka marrë.
“Unë kam vepruar në kushtet e një presioni të madh politik mediatik me komptetenca mjaft të kufizuara në mungesë të plotë të institucioneve. Kam dëshmuar mjaftueshëm që s’kam varësi nga politika, jam anatemuar shumë për të kundërtën dhe është bërë sa herë ka pasur një rast të vecantë. Kur cështjet janë zgjidhur unë më shumë se në një rast e kam vërtetuar të kundërtën psh i fundit, për një vendimmarrje të sektorit të dekriminalizimit në prokurori, për kryetarin e bashkisë Vorë. Aq më tepër që unë isha në një periudhë kandidimi e zgjedhje. Nuk kam vepruar asnjëherë e varur e për të arritur qëllime të miat personale. Kam pasur mbështetjen e komunitetit ndërkombëtar dhe me mbështetjen e tyre jam zgjedhur”, vijoi Marku.
