Revolta e nisur në mbarë Shqipërinë pas vrasjes së një të riu 25-vjeçar në Tiranë, nga Policia e Shtetit, ka ngjallur edhe reagimin e shumë figurave të njohura të jetës publike.
Një ndër ta, artisti i madh, Robert Ndrenika, ka reaguar sot për protestën e zhvilluar prej dy ditësh në Tiranë kundër vrasjes së 25-vjeçarit, Klodian Rasha, nga policia.
Duke folur për mediat, aktori i mirënjohur është shprehur se “Ndoshta edhe unë kam arsye të mos e dua Edi Ramën por anarshinë e URREJ!!!”
Reagimi vjen pas ngjarjes së rëndë që ndodhi tri ditë më parë në Laprakë, kur efektivi Nevaldo Hadëraj qëlloi dy herë me armën e shërbimit të riun, pasi nuk pranoi të ndalonte kur i bëri thirrje. Klodian Rasha u qëllua në kokë dhe në shpinë dhe sipas prokurorisë e gjithë ngjarja ndodhi në më pak se 3 minuta.
Vrasja ka hapur një valë zemërimi dhe inati ndaj qeverisë, ku pas presionit nga protestat masive ministri i Brendshëm Sandër Lleshaj dha dorëheqjen.
Qindra të rinj, të palidhur me asnjë parti politike, kërkojnë edhe sot largimin e drejtorit të Përgjithshëm të Policisë, Ardi Veliu ndërsa nuk munguan as përplasjet me efektivët që ishin lënë në terren për të menaxhuar mbarëvajtjen e protestës.
Vrasja e Klodian Rashës, nga efektivi i “Shqiponjave”, pas mesnatës së të hënës, ngjalli revoltë masive te qytetarët, të cilët kanë protestuar prej dy netësh, duke sulmuar institucionet, por edhe policinë, që nga ana e saj ka përdorur disa herë gaz lotsjellës për të shpërndarë turmën.
/GazetaReforma.com/
