Radhë të gjata në pjesën greke të doganës së Kakavijës me automjete privatë dhe kamionë mallrash që presin të kalojnë traun.
Greva 24 orëshe e doganierëve grekë të Kakavijës ka shkaktuar kaos, pasi njoftimi i ndërprerjes së punës u bë vetëm një ditë më parë.
Ndërkaq, në pjesën shqiptare nuk ka asnjë automjet në pritje. Deri tani, kanë kaluar drejt Greqisë 120 qytetarë në këmbë, ndërsa nga Greqia në Shqipëri kanë ardhur 34 persona.
Autoritetet e Policisë greke, në bazë të një njoftimi zyrtar që i kanë dërguar Policisë Kufitare Kakavijë, sqaruan dje se për shkak të grevës që do të zhvillohet nga punonjësit e doganës greke, do të ketë një ndërprerje të punës, duke filluar nga dita e martë, datë 24 nëntor, ora lokale greke 07:00 deri në orën 07:00 të datës 25 nëntor.
“Sqarojmë se gjatë këtij harku kohor, si në hyrje dhe në dalje të doganës greke, nuk do të lejohet kalimi i automjeteve si motoçikleta, autovetura, furgonë që transportojnë qytetarë dhe kamionët që transportojnë mallra”, thuhej në njoftim.
Sipas njoftimit të palës greke, përjashtim do të ketë vetëm për udhëtarët këmbësorë, kamionët që transportojnë mallra ushqimore që ruhen në kushte frigoriferike, kamionët që transportojnë kafshët e gjalla dhe automjetet për raste emergjente shëndetësore apo raste vdekjesh.
/GazetaReforma.com/
