Në protestën e 15 të zhvilluar sot para Bashkisë së Tiranës kundër korrupsionit, Belind Këlliçi akuzoi kryetarin e bashkisë, Erion Veliaj, dhe kryeministrin Edi Rama për vjedhje masive dhe manipulime zgjedhore. Këlliçi kërkoi që Veliaj të japë llogari për akuzat e manipulimit të votave në zgjedhjet e 14 majit 2023.
“Ky individ duhet të vijë këtu para jush të japë llogari pse vodhi votat në 14 maj 2023,” tha Këlliçi, duke theksuar se përgjigjet e Veliajt për pyetjet e qytetarëve mbi çerdhet, kopshtet, shkollat dhe parqet ishin oferta monetare për vota. “Në fakt, fliste për një vjedhje të paprecedentë.”
Këlliçi gjithashtu theksoi se manipulimet zgjedhore nuk janë fenomen i izoluar, por pjesë e një skeme të gjerë korrupsioni të drejtuar nga Partia Socialiste. “Ajo që ka ndodhur në 14 maj 2023 ka ndodhur në të gjithë Shqipërinë, sepse Rilindja nuk di të fitojë. Rilindja di vetëm të vjedhë, Edi Rama di vetëm të vjedhë, ministrat dinë vetëm të vjedhin,” deklaroi ai.
Duke mbyllur fjalimin, Këlliçi ngriti pyetjen për dorëheqjen e Veliajt dhe Ramës: “Çfarë duhet të ndodhë më me këtë kryetar bashkie që ky të japë dorëheqjen?! Kur shtabi i tij elektoral i 14 majit sot një pjesë është në burg, një pjesë është në arrati, një pjesë pritet shumë shpejt që të shkojë në qeli.”
Ai gjithashtu iu drejtua qytetarëve, duke i ftuar të marrin pjesë në një protestë të madhe më 11 korrik: “Ju ftoj që në datën 11 korrik në orën tetë të mbrëmjes, ta mbushim sheshin para Kryeministrisë si kurrë më parë sepse nga aty do të fillojë dhe uragani i shpresës dhe fitores së qytetarëve dhe PD-së.”
