Komiteti Teknik i Ekspertëve është mbledhur ditën e sotme dhe ka vendosur masa të reja anti-Covid. Nga 1 shtatori do të hyjë në fuqi ora e re policore, 23:00-06:00. Po ashtu u vendos vaksinimi i detyruar për disa kategori, ku përfshihen studentët, mjekët dhe arsimtarët.
Zv/ministrja e Shëndetësisë, Mira Rakacolli ka thënë se numri i rasteve është rritur, sidomos tek fëmijët. Ajo bëri me dije se fëmijët nuk janë rëndë, ndërsa janë tetë që po marrin trajtim spitalor. Ajo tha se ata kanë marrë një trajtim më të lehtë se sa në dimrin e kaluar, ndërsa nuk vihen re komplikacione nga Covid017, siç ka nodhur më parë.
“Ka një shtim të numrit të rasteve të fëmijëve. Fëmijët nuk janë rëndë, janë 8 fëmijë që po marrim trajtim spitalor. Ata kanë një trajtim më të lehtë se sa në dimrin e kaluar. Nuk vihen re komplikacione nga COVID-19 siç janë vënë re më parë”, ka thënë Rakacolli.
Ndër të tjer, Komiteti Teknik vendosi që të mbetet në fuqi mbajtja e maskës në ambiente të mbyllura. Po ashtu u vendos që personat që do hyjnë në vend duhet të paraqesin pasaportën e vaksinimit, test PCR negativ të kryer brenda 72 orëve ose dëshmi që e kanë kaluar Covid-19 në 6 muajt e fundit.
