Deputeti demokrat i Fierit, Luan Baçi do të marrë pjesë në foltoren që ish-kryeministri Sali Berisha do të mbajë në këtë qytet gjatë ditës së sotme.
Ai ka deklaruar se një veprim të tillë e bën me kërkesë të demokratëve të Fierit, ndërsa shtoi se kjo lëvizje e Berishës nuk sjell përçarje mes demokratëve, por bashkim.
Baçi tha për mediat se Partia Demokratike nuk është as e kreut aktual, Lulzim Basha e as e Berishës, por e demokratëve.
“Jam pjesëmarrës si të gjithë anëtarët dhe simpatizantët e PD-së së Fierit. Ka një lloj entuziami nga strukturat e PD-së së Fierit për të qënë këtu. Ka patur një thirrje mes anëtarëve të PD-së për të marrë pjesë në këtë foltore dhe absolutisht unë jam një prej tyre”, tha Baçi.
Kujtojmë se ish-kryeministri Sali Berisha do të mbajë sot takimin e radhës në qytetin e Fierit. Takimin e parë me demokratët ai e mbajti në Tiranë, ku sërish kundërshtoi hapur vendimin e Bashës për ta përjashtuar nga grupi parlamentar i Partisë Demokratike, për shkak të shpalljes së tij “non-grata” nga SHBA. Berisha ka njoftuar se turi i takimeve do të vijojë në gjithë Shqipërinë dhe ka si qëllim një PD më të fortë dhe të bashkuar.
