Kryeministri Edi Rama ka deklaruar më në fund se në lumin Vjosa nuk do të ndërtohen hidrocentrale. Këtë deklaratë ai e bëri në “Open” ku tha se debate për Vjosën është nisur dhe është çuar para nga PS. Megjithatë Rama ka thënë se nuk mund të frenohet agroturizmi, ndërsa për ujin nuk diskutohet që është e mbrojtur.
“Debatin për Vjosën e kemi nisur ne, e kemi çuar para ne. Hidrocentrale në Vjosë nuk do të ndërtohen. Saliu i ka bërë, njësoj si në Valbonë. 11 la në Valbonë dhe përsëri na kthehen ne. Në Vjosë nuk ndërtohen hidrocentrale. Por nuk frenojmë dot agroturizmin. Për ujin, aty nuk diskutohet që është e mbrojtur. Nuk ka hidrocentrale në Vjosë, ka marrë fund kjo histori”, tha Rama.
Kujtojmë që ndërtimi i hidrocentraleve mbi lumin Vjosa ka ngjallur shumë debate dhe ka hasur në kundërshtime të shumë aktivistëve të shoqërisë civile dhe ambientalistëve.
Në mbrojtje të lumit Vjosa është deklaruar madje edhe aktori i famshëm Leonardo DiCaprio, i cili vetëm pak ditë më parë postoi një video ku kërkonte reagimin e politikanëve shqiptarë. Videon e rishpërndanë Lulzim Basha, Ilir Meta e Monika Kryemadhi, ndërsa rama nuk kishte reaguar deri mbrëmjen e sotme.
Lumi Vjosa është lumi më i madhe i egër në Europë dhe është habitat për më shumë se 1100 specieve të ujërave të ëmbla, ndërsa ka një rëndësi jetike për banorët e zonave ku kalon.
