Rreth orës 11 të paradites së sotme përballë Universitetit të Arteve ka nusur protesta e pedagogëve. Kreu i Sindikatës së Pedagogëve, Sandër Kovaçi deklaroi se kërkesat e tyre të paraqitura më herët janë të panegociueshme nga ana e tyre. Ai deklaroi se ato janë kërkesa minimaliste, duke theksuar se pagat e pedagogëve nuk janë në përputhje me tregun e punës. Data 17 që shënon fillimin e viti të ri akademik është afati i fundit për plotësimin e kërkesave ose viti akademik 2023-2024 do të fillojë me studentë në salla, por pa pedagogë.
“Ka pasur keqkuptime mbi përmbajtjen e peticionit, ka pasur sugjerime që propozimi të përfundojë me një manifest. Ne e kemi thënë që nuk bëhet fjalë për rrogën e një pedagogu që të mbajë familjen e tij, por që të jetë dinjitoz. Kemi kërkuar rritje 30% këtë vit dhe 20 % vitin e ardhshëm. Duke u nisur nga kriza ekonomike ne e kemi zbritur kërkesën duke qenë solidarë me këtë situatë. Kërkesat tona kryeministri i quajti ultimatum, por i themi kryeministrit ta shikojë universitetin me një sy tjetër. Sot gjendja e profesoratit është në një tjetër gjendje dhe nuk është marrë parasysh asnjë kërkesë dhe nuk ka pasur rritje. Nëse e krahasojmë me Kosovën ka ardhur koha të mos themi që ta bëjmë Shqipërinë si gjithë Europa, por ta bëjmë si Kosova”, tha ai.
