Në dhomën penale të Gjykatës së Tiranës janë zhvilluar dëgjimet e para për vrasjen e Martin Canit, ngjarje e ndodhur pranë shkollës “Fan Noli”, ku si i akuzuar për ngjarjen rëndon emri i Mario Përlleshajt. Në seancën gjyqësore u morën në pyetje pesë të mitur në cilësinë e dëshmitarëve, të cilët kanë dhënë deklarimet e tyre në prani të psikologes dhe prindërve, për të sqaruar dinamikën e ngjarjes tragjike.
Seanca e radhës u shty për më 28 maj, datë në të cilën do të merren në pyetje edhe tetë të mitur të tjerë që dyshohet se kanë dijeni për atë që ndodhi.
Por seanca nuk ka kaluar pa tension. Në sallën e gjyqit janë regjistruar debate mes palëve, sidomos në momentin kur prokurorja Alma Felaj është përballur me reagimin e ashpër të prindërve të Luis Meçes , adoleshentit që mbeti i plagosur në të njëjtën ngjarje. Babai i tij, i revoltuar për ecurinë e hetimeve, është nxjerrë jashtë sallës nga gjykata pas një përplasjeje verbale me përfaqësuesen e akuzës.
Sipas burimeve nga salla, tensionet u ndezën kur u përmend dita para krimit. Sipas dëshmive, Martin Cani dhe Luis Meçe kishin qenë duke luajtur futboll në Kavajë, ndërsa në kthim ishin shoqëruar nga prindërit e Luizit. Gjatë diskutimeve u përmend mundësia që të miturit të kenë pasur një debat telefonik me palën tjetër atë mbrëmje. Në këtë kontekst, prokurorja Felaj ka shprehur: “Mbase prindërit kanë qenë në gjumë”, gjë që shkaktoi reagimin e menjëhershëm të babait të Luizit, i cili iu drejtua asaj me fjalët: “Ju po flini gjumë me dosjen, ne na zien zemra çdo ditë.”
Ngjarja mbetet një plagë e hapur për familjet e përfshira, ndërsa hetimet ende nuk kanë zbardhur tërësisht motivet dhe përgjegjësitë.
