Anëtarja e Kryesisë së Partisë Demokratike (PD), Jozefina Topalli, ka mbajtur një fjalim të fortë përpara protestuesve në ‘Rrugën e Shpresës’, duke shënuar ditën e 200-të të arrestimit politik të liderit të opozitës, Sali Berisha. Topalli e cilësoi këtë arrestim si një sulm brutal ndaj demokracisë dhe të drejtave të njeriut.
“Sot janë 200 ditë nga arrestimi i kryetarit të opozitës, Sali Berisha. Imagjinoni në një vend të lirë, në një vend të NATO-s, sikur të mbahet vetëm një orë në arrest lideri i opozitës. Do të ishte një tragjedi për demokracinë,” deklaroi Topalli, duke theksuar se arrestimi i Berishës është një padrejtësi që kërcënon sigurinë e çdo qytetari në vend.
Topalli kritikoi ashpër mënyrën e trajtimit të Berishës, duke e quajtur një akt brutal që kujton kohët më të egra. Ajo shtoi se vendimi për arrestimin e Berishës është marrë nga një gjyqtare e cila vetë është dënuar nga drejtësia e vendeve fqinje, duke e cilësuar këtë si një arrestim politik të pastër.
“Një arrest prej 200 ditësh në shkelje të të gjithë rregullave dhe normave të të drejtave të njeriut, dhe ajo që vendos për arrestin e Berishës është një gjyqtare e cila është e dënuar nga drejtësia e vendeve fqinje. Kjo nuk ka emër tjetër veçse arrest politik,” vazhdoi Topalli.
Ajo gjithashtu bëri një paralelizëm historik, duke kujtuar se në të kaluarën, kryeministrat ose janë larguar me dhunë, ose janë varur ose burgosur, dhe të mendosh që skenarë të tillë ndodhin në kohën e demokracisë është e papranueshme për ne dhe historinë tonë.
Topalli përfundoi fjalimin e saj me një apel për drejtësi dhe për të mos lejuar që padrejtësia të triumfojë në Shqipëri.
