SPAK ka propozuar Joni Ketën për kreun e Byrosë Kombëtare të Hetimit pas një procesi disa mujor, dhe këtë të martë Këshilli i Lartë i Prokurorisë miratoi unanimisht kandidaturën e tij. Me 11 vota pro dhe asnjë kundër, KLP i dha Ketës mandatin 5-vjeçar në krye të BKH-së.
Keta, i cili deri më tani ka shërbyer si zv.drejtor dhe drejtues i komanduar i Byrosë, konsiderohet një nga favoritët për shkak të karrierës së tij të gjatë në zbatimin e ligjit. Ai ka kaluar nga pozicionet në Policinë Gjyqësore për Krimet e Rënda deri te posti i oficerit të parë të BKH-së që prej krijimit të SPAK. Në vitin 2024, ai fitoi garën për pozicionin e zv.drejtorit mes gjashtë kandidatëve.
Seanca e KLP-së u mbajt në prani të përfaqësuesve amerikanë të misionit të asistencës për SPAK-un. Mbledhja nisi me debate mbi procedurën, pasi një pjesë e anëtarëve kërkuan të sqarohej nëse duhej lexuar raporti i plotë i mbërritur nga SPAK apo një version i përmbledhur. Me 9 vota pro, u vendos që të lexohej raporti i përmbledhur i Këshillit.
Pas shqyrtimit të materialeve dhe verifikimit të procedurave, kandidatura e Ketës u votua unanimisht.
Joni Keta vjen nga një familje me profil të lartë institucional. Ai është djali i prokurorit Hysen Keta, me karrierë të gjatë në sistemin e drejtësisë dhe anëtar i Këshillit të Etikës në KLP. Nëna e tij, Majlinda Keta, profesoreshë e Universitetit të Tiranës dhe një nga themelueset e Partisë Socialiste, prej vitesh është distancuar nga “Rilindja” duke mbajtur qëndrime të majta kritike. Keta është gjithashtu nipi i Bahri Shaqirit, ish-drejtori më jetëgjatë i SHISH dhe një figurë me role të rëndësishme shtetërore. Familja e tij ka histori të hershme përfshirjeje në çështjet kombëtare.
Me këtë votim, BKH merr zyrtarisht drejtuesin e ri, një figurë që ka ndjekur nga afër ngritjen dhe funksionimin e strukturës që prej themelimit të saj.
