Kryeministri britanik, Boris Johnson ka hapur samitin e G7, ku ka thënë se është jetike të mësohez nga gabimet e krizës financiare të vitit 2008 dhe të trajtohet problemi i pabarazisë.
Në fjalët e tij të hapjes në diskutimet kryesore në tryezën e rrumbullakët, Z. Johnson tha se, ndërsa bota u rikuperua nga pandemia, ishte e rëndësishme të të reduktohen pabarazitë në shoqëri dhe të ndërtohet më mirë pas pandemisë. Ai shtoi: “Unë në fakt mendoj se kemi një mundësi të madhe për këtë sepse, si G7, ne jemi të bashkuar në vizionin tonë për një botë më të pastër, më të gjelbër, një zgjidhje për problemet e ndryshimit të klimës”.
Kryeministri gjithashtu tha se ishte “jetësore që të mos përsërisnim gabimet e krizës së fundit të madhe – recesionit të fundit të madh ekonomik të vitit 2008 – kur rimëkëmbja nuk ishte e njëtrajtshme në të gjitha pjesët e shoqërisë.
Shpërndarja e vaksinave Covid është gjithashtu në krye të axhendës së samitit. Më herët, udhëheqësit pozuan për një foto në grup me Mbretëreshën, ku ajo u dëgjua të bënte shaka: “A duhet të dukesh sikur po kënaqesh?”
Udhëheqësit përreth Mbretëreshës qeshën, ndërsa Johnson u përgjigj prerë: “Po”.
Presidenti i SHBA Joe Biden është midis atyre që janë pritur nga Z. Johnson për takimin tre-ditor, si dhe udhëheqësit e Francës, Gjermanisë, Italisë, Japonisë dhe Kanadasë.
Ky është samiti i parë ballë për ballë i G7 – që përfaqëson shumicën e ekonomive më të mëdha në botë – që para se të fillonte pandemia në fillim të vitit të kaluar.
Po ashtu marrin pjesë edhe Presidentja e Komisionit Evropian Ursula von der Leyen dhe Presidenti i Këshillit Evropian Charles Michel.
