Mësuesi turk, Harun Çelik, i deportuar nga Shqipëria në drejtim të Turqisë, ishte planifikuar prej kohësh.
Presidenti Erdogan prej kohësh po gjurmon personat e lidhur me imamin Fetullah Gylen, të cilin numri një i Turqise e akuzon për grushtin e shtetit të 2016-ës.
Gylenistët konsiderohen nga Ankaraja zyrtare si terroristë.
Për deportimin e Harun Çelik, ka folur vetëm avokati i tij, Alban Bengasi.
Ky i fundit është shprehur, se nuk është njoftuar për operacionin.
Më tej ai shton se nuk ka mundësi ligjore, të kundërshtojë këtë deportim të paligjshëm, pasi gjithçka është kryer në fshehtësi.
Sipas “Shqiptarja.com”, shërbimet e fshehta turke, tentuan ekstradimin në 2017-ën, të mësuesit të gjeografisë, Muhammet Yasir Aydogmus.
Ky i fundit ka arritur të dalë nga burgu me detyrim paraqitje dhe më pas është arratisur nga Shqipëria.
Ai u ndalua me gruan dhe dy fëmijët në portin e Durrësit më 7 tetor të 2017-s, teksa po tentonte të largohej drejt Barit me pasaporta false.
Ndaj tij, gjykata kërkoi masën e sigurisë “Arrest me burg”.
Aydogmus ka pranuar falsifikimin e pasaportave të familjarëve të tij, ndërsa është shprehur se në Turqi i rrezikohej jeta, për shkak të bindjeve politike.
Pas pagimit të garancisë pasurore prej 1 milion e gjysmë lekë të vjetra, ai dhe gruaja e tij u lanë në detyrim paraqitje.
Gjatë kohës që ka qenë në masën e sigurimit “Detyrim paraqitje”, oficeri i policisë së Drejtorisë Vendore për Kufirin dhe Emigracionin Durrës, Ardit Kërçuku, ka kërkuar arrestimin e tij.
Po atë ditë vjen edhe njoftimi nga Interpol Tirana, se mësuesi ishte shpallur në kërkim nga aiutoritetet turke dhe kërkohej arrestimi i tij provizor.
Më 13 tetor të 2017-ës ai ka paraqitur edhe kërkesën për azil me argumentin se në Turqi i rrezikohet jeta.
Kërkesa e tij nuk është shqyrtuar, por gjykata e ka liruar sërish me detyrim paraqitje.
Largimi i tij solli një reagim të ashpër nga amasada turke në Tiranë.
Konsulli Cem Baş tha se vendimi i Gjykatës së Durrësit ishte skandaloz dhe tashmë një terrorist është i lirë.
Sipas konsullit, gjykatësi ra në kurthin e politizimit të çështjes.
