Një letër e kreut të Policisë Ardi Veliu, drejtuar vartësve të tij është zbardhur së fundmi, nëpërmjet të cilës zbulohet se tashmë për të shmangur zbulimin nga kontrollet ajrore, grupet kriminale në Shqipëri kanë zgjedhur mënyra alternative të kultivimit të kanabisit.
Drejtori i Përgjithshëm i Policisë së Shtetit u kërkon drejtuesve të policive të bashkëpunojnë me autoritetet vendore për të identifikuar pronarët e magazinave, depove, tuneleve, ish-reparteve ushtarake, shtëpive të braktisura, serave, staneve e të tjera, që shfrytëzojnë trafikantët, raporton Shqiptarja.com.
Po ashtu, kërkohet ndihmë edhe nga OSHEE për identifikimin e konsumatorëve të cilët mund të përdorin energjinë elektrike më shumë se sa nevojat e tyre, që rrjedhimisht çon tek dyshimet për kultivim kanabisi.
Veliu i shpreh hapur kritikat për uniformat blu për kontrollin jo të plotë në zonat me risk të lartë për kultivimin e kanabisit, fenomen që njohu rritje në vitin 2019.
Më herët ditën e sotme, ministri i Punëve të Brendshme, Sandër Lleshaj, tha se përpjekjet e Policisë me kanabisin duhet të japin rezultat brenda qershorit, ndërsa kërkoi bashkëpunim me autoritetet vendore për identifikimin e çdo zone ku kultivohet droga.
Gjatë një takimi me drejtues të Policisë ai tha se në monitorim do të përdoren edhe drone, në bashkëpunim dhe me Forcat e Armatosura.
“Shtimi i kapaciteteve, qofshin të monitorimit përmes droneve dhe kapaciteteve të monitorimit ajror, në bashkëpunim dhe me Forcat e Armatosura, shtimi i kapaciteteve logjistike, kryesisht në fushën e transportit, duhet të shërbejnë si motivim shtesë për ta rritur me tej intensitetin e luftës në këtë sektor, luftë e cila duhet të përfundojë shumë shpejt”.
