Banorët e sektorit Rinia dhe Porto Romanos në Durrës kanë protestuar sot kundër magazinimit të kontenierëve që dyshohet të përmbajnë mbetje të rrezikshme, të cilat janë depozituar pranë banesave të tyre.
Banorët kërkojnë që kontenierët, të cilët janë ruajtur 24 orë nga policia, të zhvendosen në një zonë të largët nga qendrat e banuara, duke theksuar shqetësimet e tyre për shëndetin dhe sigurinë.
“Kemi 30 vjet që jetojmë këtu, është një zonë e ndotur, kemi pasur probleme me mbeturinat, kanë vdekur njerëzit nga tymrat që krijoheshin nga djegia e mbeturinave”, tha një banor
Ata kujtojnë se ka pasur raste vdekjesh për shkak të ndotjes dhe tymrave nga djegia e mbeturinave në të kaluarën.
“Kemi frikë për jetën, kanë vdekur njerëz nga papastërtitë, nga plehrat, nga mbeturinat që digjeshin”, tha qytetari
Ndërkohë, Prokuroria e Durrësit ka nisur hetime për transportimin e një ngarkese prej 816 tonësh, që dyshohet të përmbajë mbetje të rrezikshme nga filtrat e furrave të çelikut të kompanisë KURUM. Ngarkesa u nis më 4 korrik 2024 nga Porti i Durrësit për në Tajlandë, por u kthye pasi u ndalua nga autoritetet tajlandeze, që refuzuan të pranonin mbetjet e rrezikshme sipas Konventës së Bazelit, një marrëveshje ndërkombëtare që rregullon tregtinë e mbetjeve të rrezikshme.
