Ditën e djeshme dy ushtarë janë sulmuar në Uzinën e Armëve në Gramsh nga 2 rusë dhe 1 ukainas, të cilët janë arrestuar nga policia. Dy prej tyre po qëndronin në automjetin me targa ukrainase, ndërsa njëri që mbante aparat fotografik i është afruar perimetrit të uzinës.
Ndërkohë është zbardhur dëshmia e dy rusëve dhe ukrainasit që tentuan të hynin mbrëmjen e djeshme në bazën ushtarake në Gramsh.
33-vjeçarja Svetlana Timofoeva, me pasaportë ruse, Mikhail Zorin 23-vjeç me pasaportë ruse, dhe një tjetër i ri me pasaportë ukrainase janë arrestuar nga autoritetet shqiptare mbrëmjen e së shtunës pas incidentit në Uzinën e Përpunimit të Armëve në Gramsh.
Ata kanë deklaruar para policisë se ishin fotografë dhe se kishin faqe blog ku reklamonin kryesisht foto dhe video të ish bazave ushtarake të Bashkimit Sovjetik.
Ndër të tjera janë shprehur se fotografonin kryesisht territore ushtarake që janë të braktisura.
Gjithashtu kanë treguar se kanë fotografuar bunkerë dhe tunelë të nëndheshëm, si dhe vende të uzinës, territore të braktisura,
Policia e Gramshit informoi se grupi hetimor, nën drejtimin e Prokurorisë së Rrethit Gjyqësor Elbasan, vijon punën për zbardhjen e rrethanave të ngjarjes dhe dokumentimin ligjor të saj dhe se për këtë ngjarja janë angazhuar Departamenti i Policisë Kriminale dhe Drejtoria e Antiterrorit në Policinë e Shtetit dhe po koordinohen veprimet me Shtabin e Përgjithshëm të Forcave të Armatosura.
