Me siguri Donald Trump as që e imagjinonte se SHBA do renditej e para në rang botëror për bilancin e krijuar nga COVID-19, kur deklaronte se nuk do merrte masa të rrepta dhe se shumë shpejt amerikanët do i riktheheshin jetës normale.
Ndonëse deri tani janë regjistruar 533,470 të infektuar dhe 20,595 viktima, duket se shteti amerikan ende nuk e ka kaluar pikun e epidemisë.
“Zëri i Amerikës” raporton se SHBA është afër pikut të pandemisë së koronavirusit të ri, por shton se ekspertë të tjerë shprehen se pa një vaksinë ose një kurë të efektshme, rihapja plotësisht e ekonomisë mund të zgjasë shumë.
“Modelet tregojnë se jemi shumë afër pikut. Prandaj mendoj se informacioni është i saktë,” tha Komisioneri i Administratës së Ushqimit dhe Barnave Stephen Hahn për programin “This Week” të televizionit ABC.
Ndonëse kreu i Shtëpisë së Bardhë ka sugjeruar në një nga daljet e tij se Pashkët mund të ishin momenti që të rikthehej jeta normale, mjekët thanë se rihapja do të ishte e pamundur para fillimit të majit, duke paralajmëruar se infeksionet mund të rigjallërohen nëse hiqen kufizimet.
Eksperti amerikan Zeke Emanuel, këshilltar special i drejtorit të përgjithshëm të Organizatës Botërore të Shëndetit, tha për ABC News se nuk parashikon që jeta t’i kthehet plotësisht normalitetit edhe për 18 muaj të tjerë.
“Kushdo që ju thotë se do të kemi një vaksinë për tre ose katër muaj, ky nuk është realiteti se si funksionon biologjia dhe kërkimi shkencor,” tha ai.
Megjithëse disa modele parashikojnë që e diela të shënojë pikun e sëmundjes, kurba e zbritjes nënkupton shumë javë të tjera gjatë të cilave njerëzit në të gjithë vendin duhet të tregojnë kujdes, thanë zyrtarët.
