Një përplasje e fortë verbale u regjistrua në seancën plenare mes kreut të Partisë Demokratike, Sali Berisha, dhe deputetes Elisa Spiropali, pas reagimit të kësaj të fundit për largimin nga posti i ministres së Jashtme.
Gjatë fjalës së saj në Kuvend, Spiropali u shpreh se ishte habitur nga fakti që paralajmërimi për largimin e saj kishte ardhur më herët nga Sali Berisha. Ajo theksoi se për të çdo detyrë në Parlament është një nder, ndërsa shtoi se nuk kishte asnjë shqetësim tjetër për largimin përveç faktit se ishte paralajmëruar nga kundërshtari politik.
“Unë nuk flas vetëm anglisht, por edhe gjuhë tjetër të huaj. Por më mirë se shqipen nuk flas asnjë gjuhë. Edhe flas shqip, flas troç dhe flas sic duhet me Shqipërinë dhe për Shqipërinë. Cdo detyrë këtu në Kuvend është nder i madh. E vetmja gjë për të cilën më vjen keq është që largimin e paralajmëroi Sali Berisha dhe jo ndonjë tjetër. Vetëm për këtë jam e habitur që i doli fjala dhe për asgjë tjetër“, tha Spiropali.
Pas deklaratës së saj, Berisha reagoi nga salla e Kuvendit me një përgjigje të ashpër, duke e lidhur largimin e Spiropalit me qëndrimet e saj politike dhe jo me ndërhyrjen e opozitës.
“Je viktima më e parëndësishme e Lubisë dhe më e merituara. Në një kohë kur sytë e shqiptarëve drejtoheshin drejt asaj sikur të ishte korba e zezë, në fakt aty afër ishte, ti na vije si nuse këtu, e veshur me të bardha, me të gjitha aksesorët. Pse çfarë kujton ti se bar hante Lubia? Ndaj dhe nuk e ke nga Sali Berisha, jo, e ke nga vetja jote, se jo që nuk e mbroje, përkundrazi gëzoheshe se tani do bëheshe ti zëvendëskryeministre, nuk ta priste mendja se ishte kjo tjetra, kloni i Lubisë. Ja ku e ke klonin! Ti ke probleme të mëdha në shkenca. Kjo është kloni. Ndaj dhe nuk e ke nga Sali Berisha atë, se për Sali Berishën, Edi Rama të lartësonte njëlloj siç lartësoi këtë klonin e Lubisë, por e ke nga vetja jote se more përpjetë ti. Iku Lubia, the tani, ja shiheni, unë do jem Lubia juaj tani, u thoshte kjo. Dhe këta të dhanë atë që meritove“, deklaroi Berisha.
Debati mes dy politikanëve u zhvillua në një atmosferë të tensionuar në sallën e Kuvendit, duke shënuar një tjetër përplasje të fortë mes mazhorancës dhe opozitës gjatë seancës plenare.
