Kryeministri Edi Rama ka komentuar fushatën e opozitës duke thënë se është i frikësuar, por jo nga fakti se do fitojnë, por për shëndetin e njerëzve. Në një intervistë në Neës 24 Rama tha se kudo që shkon drejtuesi i opozitës, krijohet një vatër e re.
“Jam i frikësuar vërtetë. Kanë të drejtë kur thonë se jam i frikësuar, por jo nga uragani që do i çojë në fitore. Jam i frikësuar për njerëzit sepse mund të ndikojë në shëndetin e tyre por edhe në përgjegjësi. Kudo që shkon drejtuesi i opozitës, krijohet vatër e re. Edhe në Kosovë ka rritje numrash. Nuk shoh uragan por përsëritjen bajate të të njëjtit film. Është përpjekje për të stimuluar se ka shumë njerëz. Italianët kishin një shprehje të bukur që thoshte; sheshet plot dhe kutitë bosh!”, tha Rama.
Ai foli gjithashtu edhe për fushatën elektorale që po zhvillohet paralelisht me fushatën e vaksinimit. Rama tha se ai është me palnë që po e ndihmon fushatën e vaksinimit, ndërsa pala tjetër po bën fushatë infektimesh, referuar Partisë Demokratike.
“Kjo është një pyetje shumë e rëndësishme, për faktin se e dyta mund ta ndihmojë shumë të parën, ose mund ta dëmtojë shumë të parën dhe këtu njëra palë që jemi ne besoj që po e ndihmon këtë fushatë vaksinimi, duke u kujdesur që të zbatojmë rregullat e të mos jemi pjesë e ‘programit të infektimit’ që ka virusi. Ndërkohë që pala tjetër po bën një fushatë infektimesh për fat të keq dhe ku më rrëqethet mishi kur kam parasysh eksperiencën e tmerrshme të Malit të zi e cila ishte një nga vendet më pak të prekura, madje nisën të bëjnë edhe spote televizive ‘hajde në Mal të Zi për pushime se është covid free’ dhe me marshime ekzaktësisht të njëllojta njerëzish që harruan që në nëpër këmbë ishte hija e vdekjes, ata u kthyen në një vend me infektime të shumëfishuara dhe patën humbje të konsiderueshme jetësh nga marshuesit nëpër këto aktivitete”, ka thënë Rama.
