Kryetarja e Gjykatës së Elbasanit, Enkelejda Kapedani, ka reaguar sërish pas videove të publikuara në media e rrjetet sociale, konkretisht në TikTok, ku ajo shihej teksa dëgjonte muzikë dhe bënte “sfilatë” në ambientet e brendshme të Gjykatës së Elbasanit. Pas publikimit të videove dhe bujës së madhe që bëri në media, kryetarja e Gjykatës së Elbasanit ka reaguar sërish pak çaste më parë.
Reagimi i Kapedanit – “Qëndrimi im në lidhje me shpërndarjen e disa videove nëpër media. Si gjyqtare në radhë të parë dhe si nënkryetare e Gjykatës ndjehem keq nga publikimi i këtyre videove vetëm për të më dëmtuar imazhin. Unë si gjyqtare e kam të ndaluar të komentoj, por do pres me qetësi verifikimin e kësaj situate.
As si individ as si gjyqtare nuk jam krenare për videot e publikuara. Shpresoj që ky sulm mos të jetë ndaj meje sepse jam grua dhe nene. Ndërsa kërkoj ndjesë për cilindo që është ndjerë keq nga ato video. Dua të theksoj me forcë se asnjë insinuatë apo përbaltje nuk do më influencojnë të jap drejtësi dhe të punoj ndershmërisht si deri më sot”, është shprehur Kapedani.
Pas publikimit të videove në media, Inspektori i Lartë i Drejtësisë, Artur Metani, ka urdhëruar nisjen e hetimit disiplinor ndaj kryetares së Gjykatës së Elbasanit.
