Gazetarja amerikane Sarah Carter, thotë se presidenti amerikan Donald Trump ka tërhequr nominimin e zyrtares së lartë, që pritej të konfirmohej si ambasadore e SHBA-ve në Shqipëri.
Carter ka folur për “Fox News”, ndërsa e ka bërë publik informacionin edhe në profilin e saj në Twitter.
Në artikullin e saj reporterja, duke cituar një zyrtar të Shtëpisë së Bardhë, shpjegon se Kathleen Ann Kavalec është emëruar përmes procesit të karrierës, por presidenti ia ka tërhequr nominimin.
Kavalec, nga sa pretendon ajo duke cituar të njëjtin burim, nuk është në pritje në Senat dhe nuk është konfirmuar asnjëherë në këtë post.
Zyrtarja e DASH-it ka komunikuar me ish-agjentin britanik, Christopher Steele, i cili kishte hartuar një dosje me pretendime shkeljesh e komploti ndërmjet fushatës presidenciale të Trumpit dhe Moskës në zgjedhjet e vitit 2016, sipas gazetares.
Carter thotë se kanë dalë në dritë informacione që tregojnë se, Kavalec u takua personalisht dhe ka pasur komunikim të vazhdueshëm me Steele, para dhe pas zgjedhjeve presidenciale.
Punonjësja veterane e DASH-it, e cila ka punuar edhe për zëvendëssekretaren e Shtetit, Victoria Nuland, është mbështetëse e ish-presidentit Barack Obama dhe ish-kandidates demokrate në garën për Shtëpinë e Bardhë, Hillary Clinton, dhe se ka bërë për fushatat e secilit prej tyre nga një donacion të vogël prej 250 dollarësh, shton më tej gazetarja.
