Erion Veliaj transferohet në burgun e Fierit, Drejtoria e Burgjeve nuk tregon arsyet e vendimit

Erion Veliaj është transferuar nga paraburgimi i Durrësit në Institucionin e Ekzekutimit të Vendimeve Penale (IEVP) Fier, me vendim të Drejtorisë së Përgjithshme të Burgjeve.

Transferimi nuk është kryer me kërkesë të Veliajt, por me vendim të autoriteteve penitenciare. Deri më tani, nuk është dhënë asnjë shpjegim zyrtar për arsyet e kësaj lëvizjeje.

Veliaj ndodhej në paraburgimin e Durrësit që prej shkurtit 2025, kur u arrestua në kuadër të hetimeve të Prokurorisë së Posaçme kundër Korrupsionit dhe Krimit të Organizuar (SPAK). Transferimi i tij në Fier vjen ndërsa dosja penale ndaj kryebashkiakut vijon procedurat në drejtësinë e posaçme.

13 akuza ndaj Veliajt dhe 12 ndaj Ajola Xoxës

SPAK ka përfunduar hetimet dhe ka dërguar për gjykim në Gjykatën e Posaçme të Shkallës së Parë dosjen penale ndaj Erion Veliajt dhe bashkëshortes së tij, Ajola Xoxa.

Sipas dosjes së prokurorisë, ndaj Veliajt rëndojnë 13 akuza, ndërsa ndaj Xoxës 12 akuza.

Nga hetimet paraprake, SPAK pretendon se Veliaj dhe Xoxa, në bashkëpunim me njëri-tjetrin, kanë përfituar në mënyrë të parregullt shuma monetare dhe pasuri të paluajtshme në nëntë raste të veçanta.

Përfitimet dyshohet se kanë ardhur nga subjekte tregtare dhe organizata jofitimprurëse, të cilat kanë marrë leje ndërtimi dhe fonde publike nga Bashkia e Tiranës.

Sipas prokurorisë, Veliaj, në cilësinë e kryebashkiakut, ka miratuar me firmën e tij shpërndarjen e fondeve publike, të cilat më pas kanë përfunduar te organizata jofitimprurëse të kontrolluara nga bashkëshortja e tij dhe persona të afërt me të.

Hetimet kanë evidentuar gjithashtu përfitime të dyshuara të pasurive të paluajtshme me vlera të konsiderueshme nga kompani që kishin marrë leje ndërtimi dhe fonde publike nga Bashkia e Tiranës.

SPAK i ka cilësuar këto veprime si elemente të veprës penale të parashikuar nga neni 260 i Kodit Penal, që lidhet me korrupsionin pasiv të personave që ushtrojnë funksione publike.

Ndërkohë, subjektet tregtare dhe organizatat jofitimprurëse që dyshohet se kanë dhënë përfitime të parregullta janë përfshirë në akuzat që lidhen me nenin 245 të Kodit Penal, për korrupsion aktiv.

Ndërsa çështja penale vijon në gjykatë, mbetet e paqartë përse Drejtoria e Përgjithshme e Burgjeve ka vendosur transferimin e Veliajt nga Durrësi në Fier dhe nëse ky vendim lidhet me arsye sigurie, administrative apo rrethana të tjera. Autoritetet ende nuk kanë bërë publik një motiv zyrtar.