Komisioni i Ekonomisë zhvilloi dje, pasdite seancën dëgjimore me dy kandidaturat për pozicionin e Inspektorit të Përgjithshëm të Bankës së Shqipërisë, Merita Bejtja dhe Manuela Tandini. Kandidatet bënë një përshkrim të shkurtër të karrierës së tyre profesionale dhe vizionit të tyre për pozicionin për të cilin kanë shprehur interes.
Merita Bejtja është Inspektorja aktuale e Bankës së Shqipërisë, e cila kandidon për një mandat të dytë 5-vjeçar.
Inspektorja e Përgjithshme e Bankës së Shqipërisë. Merita Bejtja u zgjodh nga Kuvendi në prill 2015, duke marrë 83 vota pro, 22 kundër dhe 1 abstenim përballë kandidaturës tjetër, Everst Pusta i cili mori 22 vota pro, 69 kundër, 13 abstenim. Merita Bejtja ka doktoruar për temën “Implementimi i Metodave të Bankingut Modern”.
Kandidatja tjetër, Manuela Tandini është aktualisht këshilltare ekonomike e Komisionit të Pavarur të Kualifikimit (Vetingut të gjyqtarëve).
Në këtë dëgjesë, përveç anëtarëve të komisionit, morën pjesë kryetarët e grupeve Parlamentare z. Taulant Balla, i Partisë Socialiste, z. Myslim Murrizi i grupit “Demokrat”, Edmond Stojku i grupit “Demokraci dhe Drejtësi” dhe Nimet Musai i grupit parlamentar “I pavarur”.
Emrat e kandidatëve që do të marrin mbështetjen e 28 deputetëve do i kalojnë më tej për votim seancës plenare.
/GazetaReforma.com/
