Anëtari i Kryesisë së Partisë Demokratike, Belind Këlliçi, në një konferencë për shtyp, ka ndarë një foto të kryetarit të Bashkisë Tiranë, Erion Veliaj, dhe Arben Malokut, ish-Administrator i Njësisë Administrative Zall Herr. Këlliçi akuzon Malokun për përfitime të mëdha financiare dhe leje ndërtimi nëpërmjet lidhjeve të tij familjare dhe bashkëpunimit me Veliajn.
“Të nderuar qytetarë, kjo foto është dëshmi e qartë e skemës së vjedhjes së fondeve publike ideuar nga Erion Veliaj dhe zbatuar nga drejtorët e tij,” tha Këlliçi. Ai pretendon se nga viti 2018 deri në 2023, Arben Maloku ka përfituar 3 leje ndërtimi dhe 55 tendera, me një vlerë totale prej 39 milionë eurosh, prej të cilave 34 milionë euro janë marrë nga Bashkia Tiranë.
Këlliçi shton se në vitin 2021, Maloku ka marrë një leje ndërtimi në rrugën ‘Myslym Shyri’ dhe në vitin 2022, Ministri i Brendshëm Bledi Çuçi dhe Drejtoresha e IKMT, Dallëndyshe Bici, njoftuan sekuestrimin e një pallati të tij, por nuk informuan publikun se ishte pronë e një zyrtari të lartë të Bashkisë Tiranë.
Sipas Këlliçit, kompania ARB Trans, e lidhur me Malokun, ka marrë një tjetër leje ndërtimi në Bulevardin e Ri të Tiranës dhe një në Bashkinë Kamëz. Këto veprime kanë sjellë fitime të mëdha për Malokun, të cilat janë fshehur pas emrave të tjerë, si Fatmir Firi, i cili ka dhuruar aksionet e kompanisë babait të Arben Malokut.
“Arben Maloku, me bekimin e plotë të Erion Veliajt, ka përfituar 39 milionë euro dhe 3 leje ndërtimi, për një total mbi 70 milionë euro në vetëm 5 vite,” deklaroi Këlliçi. Ai shton se Veliaj pretendon të mos ketë dijeni për veprimtaritë korruptive të zyrtarëve të tij, por kjo nuk është e pranueshme.
Këlliçi kërkon që SPAK të hetojë të gjitha veprimtaritë korruptive dhe të arrestojë Veliajn, duke e akuzuar atë për prishje të provave dhe vazhdim të veprimtarive korruptive.
Në përfundim, Këlliçi njoftoi se ditën e nesërme do të bëhen publike përfitimet e zyrtarit të radhës të Bashkisë Tiranë, Kujtim Qefalia, Administrator i Komunës Dajt.
“SPAK duhet të ngrihet në lartësinë e detyrës dhe të veprojë ndaj këtij korrupsioni të pa precedentë,” përfundoi ai.
