Trupat e Gardës Revolucionare Islamike të Iranit kanë konfirmuar se kanë ndërmarrë një tjetër sulm të përmasave të mëdha ndaj Izraelit, duke përdorur një kombinim të raketave dhe dronëve, sipas raportimeve të agjencisë shtetërore iraniane Tasnim.
Sipas deklaratës së IRGC, operacioni u realizua përmes taktikave të avancuara për të kapërcyer sistemet mbrojtëse ajrore të Izraelit, duke përdorur raketa me lëndë djegëse të ngurtë dhe të lëngshme.
Goditjet kanë pasur në shënjestër pesë qytete izraelite: Safad, Tel Aviv, Ashkelon, Ashdod dhe Beisan.
Autoritetet izraelite e kanë konfirmuar valën e sulmeve dhe kanë lëshuar urdhra për qytetarët që të qëndrojnë në strehimet kundër bombardimeve, duke rritur nivelin e alarmit kombëtar.
Përshkallëzimi mes dy vendeve ka hyrë në një fazë të rrezikshme, me reagime që po përfshijnë tashmë edhe territoret e secilës palë.
Nga ana tjetër, mediat ndërkombëtare raportojnë se Izraeli ka vazhduar goditjet në Iran. Sipas burimeve të Al Jazeera, një prej raketave izraelite ka rënë pranë një spitali në perëndim të Teheranit, duke shkaktuar panik dhe tym të dendur në zonë. Deri tani nuk ka informacione zyrtare për viktima apo të plagosur nga ky incident.
Këto sulme të ndërsjella ndodhin në vazhdën e tensioneve të rritura pas operacionit ajror të Shteteve të Bashkuara mbi objektet bërthamore të Iranit, një ndërhyrje që ka rritur ndjeshëm rrezikun e një konflikti të hapur rajonal.
Teherani ka paralajmëruar se hakmarrja do të jetë e ashpër dhe se përgjigjja e tij nuk do të ndalet me kaq.
