Këshilltari i Sigurisë Kombëtare i kryeministrit izraelit Benjamin Netanyahu tha sot se lufta kundër Hamasit në Rripin e Gazës mund të vazhdojë edhe për shtatë muaj të tjerë derisa Izraeli të arrijë qëllimin e tij për të shkatërruar lëvizjen islamike palestineze.
“Lufta mund të zgjasë edhe shtatë muaj, në mënyrë që ne të konsolidojmë sukseset tona dhe të arrijmë qëllimet tona, domethënë shkatërrimin e aftësive ushtarake të Hamasit’’, tha Chahi Hanegbi në një intervistë për televizionin publik Kan.
“Fitorja për ne do të thotë të shkatërrojmë aftësitë ushtarake të Hamasit, të kthejmë të gjithë pengjet dhe të sigurojmë që në fund të luftës nuk do të ketë më kërcënime nga Gaza,” vazhdoi ai.
Chahi Hanegbi tha gjithashtu se po zhvillohen diskutime për të ardhmen e Gazës pas luftës “në mënyrë që palestinezët të jenë përgjegjës për jetën e tyre”.
“Ne do të jemi përgjegjës për sigurinë e Izraelit, por nuk duam të sundojmë Gazën”, theksoi ai.
Pavarësisht dënimit ndërkombëtar dhe thirrjeve për një armëpushim, ushtria izraelite vazhdon operacionet e saj në Rafah, në Rripin jugor të Gazës, gati tetë muaj pas fillimit të luftës.
Kryeministri Benjamin Netanyahu thotë se qëllimi është zhdukja e Hamasit, pasi sulmi i grupit në 7 tetor në tokën izraelite vrau 1,189 njerëz, kryesisht civilë. 252 persona u rrëmbyen atë ditë, nga të cilët 121 mbahen ende në Gaza. Sipas ushtrisë izraelite, 37 prej tyre janë vrarë. Në përgjigje të sulmit të Hamasit, ushtria izraelite po kryen operacione në Rripin e Gazës, ku të paktën 36,171 njerëz, kryesisht civilë, janë vrarë, sipas ministrisë së shëndetësisë të enklavës së kontrolluar nga organizata palestineze.
