Autoritetet izraelite kanë vendosur të lejojnë hyrjen graduale dhe të kontrolluar të mallrave në Rripin e Gazës përmes tregtarëve lokalë, në përpjekje për të shtuar ndihmën humanitare dhe për të ulur varësinë nga agjencitë ndërkombëtare.
Lajmi u konfirmua më 5 gusht nga COGAT, agjencia ushtarake izraelite që mbikëqyr shpërndarjen e ndihmave në territorin palestinez.
Sipas COGAT, kjo masë synon të rrisë fluksin e ndihmave që hyjnë në Gazë dhe të zvogëlojë mbështetjen tek Kombet e Bashkuara dhe organizatat e tjera ndërkombëtare, të cilat deri më tani kanë qenë kryesore në menaxhimin e ndihmave humanitare.
Ndërkohë, Hamasi, grupi palestinez i shpallur organizatë terroriste nga SHBA dhe BE, ka bërë të ditur se është i gatshëm të bashkëpunojë me Kryqin e Kuq për të lejuar dërgimin e ndihmave tek pengjet që mban në territorin e Gazës, nëse Izraeli pranon disa kushte të caktuara.
Ky njoftim erdhi pak ditë pasi u publikua një video që tregonte një nga pengjet në gjendje të rënduar shëndetësore, duke shkaktuar reagime të forta nga shtetet perëndimore.
Sipas OKB-së dhe autoriteteve palestineze, në Gazë nevojiten të paktën 600 kamionë ndihma në ditë për të përmbushur nevojat minimale të popullsisë, një shifër që Izraeli lejonte para shpërthimit të konfliktit.
Lufta aktuale nisi më 7 tetor 2023, kur Hamasi kreu një sulm të papritur në jug të Izraelit, duke vrarë rreth 1.200 persona dhe duke rrëmbyer 251 të tjerë. Si pasojë e ofensivës izraelite që pasoi, mbi 60.000 palestinezë janë vrarë në Gazë, sipas Ministrisë së Shëndetësisë në enklavë, shifër që përfshin si civilë, ashtu edhe militantë.
Aktualisht, besohet se rreth 50 pengje mbeten ende në Gazë, por vetëm 20 prej tyre mund të jenë gjallë. Deri më tani, Hamasi nuk ka lejuar asnjë organizatë humanitare të ketë qasje tek ta, ndërsa familjet vazhdojnë të mbeten në pasiguri të plotë për fatin e të afërmve të tyre.
