Izraeli ka paralajmëruar se nuk do të lejojë anijen me të cilën udhëton Greta Thunberg dhe aktivistë të tjerë të hyjë në ujërat e Gazës.
Ministri izraelit i Mbrojtjes, Israel Katz, ka urdhëruar forcat ushtarake që të bllokojnë hyrjen e anijes “Madleen”, pjesë e Koalicionit Freedom Flotilla, në përpjekje për të thyer bllokadën detare të vendosur ndaj Rripit të Gazës që prej vitit 2007.
Në një deklaratë në rrjetin social X, Katz tha se “Izraeli nuk do të lejojë askënd të thyejë bllokadën”, duke e quajtur grupin në bord “aktivistë të ekstremit të majtë”.
Ai u është drejtuar drejtpërdrejt Thunbergut dhe 11 pjesëtarëve të tjerë të misionit, duke u thënë se duhet të kthehen pas, pasi nuk do të lejohen të mbërrijnë në destinacionin e tyre.
Koalicioni Freedom Flotilla ka deklaruar se po transporton ndihma humanitare, përfshirë pajisje mjekësore dhe furnizime për foshnje, dhe ka theksuar se nuk ka asnjë lloj armësh në bord.
Sipas organizatorëve, misioni synon të sjellë vëmendjen ndërkombëtare mbi krizën humanitare në Gaza, që prej muajsh përballet me bllokim total, mungesë ushqimi, ilaçesh dhe ujë të pijshëm.
Anija është nisur nga Sicilia një javë më parë dhe të dielën ndodhej më pak se 300 kilometra larg brigjeve të Gazës.
Në disa pamje të shpërndara në Instagram, aktivistët pretendojnë se pajisjet e tyre të komunikimit janë zhurmuar nga autoritetet izraelite, duke ngritur dyshime për një ndërhyrje të mundshme ushtarake ndaj anijes.
