Me ardhjen e COVID-19, mjeku infeksionist Pëllumb Pipero ka qenë shpesh i pranishëm në media ku ka ndarë informacione, këshilla dhe lajme suprizë me shqiptarët që janë të frikësuar rreth situatës.
Mbrëmjen e sotme, Pipero ka realizuar një lidhje me Skype me emisionin ‘Zonë e lirë’, ku është shprehur se karantinimi nuk është mënyra për të shpëtuar nga Covid-19, por është distancimi social ai që e ul kurbën.
Po ashtu, mjeku ka ndarë një lajm surprizë, pasi tha se vaksina është shpëtim dhe se një epidemiolog i ka thënë se për gjashtë muaj mund të jetë gati.
“Vetëizolimi nuk na shpëton. Askush s’e ka thënë këtë. Por distancimi lokal thjesht zbut kurbën. Nuk është se u fshehëm dhe nuk na gjeti. Vaksina është ajo që na shpëton. Por karantinimi na jep kohë. I jep kohë shkencës që të punojë dhe ul kurbën. Epidemiologu që kam kontaktuar më tha se për gjashtë muaj mund të nxjerrë vaksinën. Se di sa e saktë është, por maksimumi do të duhet një vit e gjysmë. Mendoj se vjeshta dhe fundi i këtij viti do na gjejë me një vaksinë të sigurtë për popullatën,”- tha Pipero.
Në vendin tonë deri tani janë shënuar 9 viktima, teksa 186 persona janë infektuar, mes të cilëve 4 fëmijë, sakaq 31 pacientë janë shëruar.
