Prokuroria e Posaçme Anti-Korrupsion, sekuestroi sot pasuritë e botuesit dhe pronarit të Ora News, Ylli Ndroqi. SPAK thotë se familja Ndroqi ka një nivel të pajustifikuar ekonomik dhe se këto pasuri janë përfituar nga veprimtaria që sipas SPAK, Ndroqi ka patur në vendin tonë, Turqi dhe Itali. (Lexo këtu)
Ndërkohë, Ndroqi është shfaqur i buzëqeshur në oborrin e drejtorisë së Policisë Tiranë, ku ka shkuar për tu njohur me masën e sekuestros, por edhe për të dhënë një deklarim për vendimin e SPAK për sekuestrimin e pasurisë së tij.
Siç shihet edhe në pamjet e siguruara nga Dosja.al, Ndroqi ka dalë i qetë dhe i buzëqeshur nga Policia. I veshur me një këmishë të bardhë, ai shihet teksa takon disa prej efektivëve të RENEA-s që ndodhen në ambientet e policisë.
Ndërkohë që burime për Dosja.al bëjnë me dije se Ndroqi pritet të japë edhe një deklaratë zyrtare për mediat pasi të përfundojë duke dhënë sqarimet e tij në Polici. Po ashtu, edhe televizioni Ora News pritet të ketë një deklaratë në lidhje me sekuestron e 60% të kuotave të biznesmenit Ylli Ndroqi.
