Lajm i bujshëm ishte ai i para pak ditëve, ku Drejtorit të Policisë Bashkiake të bashkisë Malësi e Madhe, iu bë një atentat.
Mentor Hasanaj, kryepolici i Bashkisë, po udhëtonte me makinën e policisë bashkiake, bashkë edhe me babain dhe bashkëshorten, dhe i riu Ilirjan Hasanaj, teksa po e ndiqte me motor, priti deri në momentin kur makina ndaloi për të qëlluar drejt tyre dhe më pas është pozicionuar edhe anash, në krah të shoferit.
Porositja e krimit
Pavarësisht mbiemrit të njëjtë, atentatori dhe drejtori i Policisë Bashkiake nuk kanë lidhje fisnore bashkë. Por, hetimet e policisë thonë se 19-vjeçari është thjesht atentator, dhe se është porositur nga të tjerë për këtë sulm ndaj drejtorit.
Po hetohet për konflikte të mundshme, por ende deri më tani asgjë nuk është zbardhur përse mund të ketë ndodhur ky sulm.
“I forti” i zonës
Burime jo të konfirmuara nga kjo bashki, bëjnë me dije se kanë qenë të shpeshta konfliktet e drejtorit të Policisë Bashkiake. Në zonë, Mentor Hasanaj njihej si një i punësuar problematik në administratën shtetërore.
Ai njihej nga banorët për bezdisjet e tij ndaj tyre, për përfitime personale. Këtë e pohojnë edhe biznesmenët e zonës, që kanë lidhje direkt me bashkinë.
Jo në pak raste, drejtori ka qenë ngacmues për përfitime personale duke u fshehur pas detyrës që mbante, në shumë tregtarë e biznesmenë. Ai njihej edhe për ‘gjobat’ që vendoste tek ta. Ky mund të ketë qenë një nga arsyet që çuan në këtë porositje të atentatit ndaj tij.
Kryetari i Bashkisë hesht
Mentor Hasanaj bashkë me bashkëshorten dhe babain e tij, i shpëtuan për fat të mirë këtij sulmi, por nga ana e bashksië Malësi e Madhe ku ai mban këtë detyrë, nuk ka pasur asnjë reagim. Si në faqen zyrtare në Facebook, ashtu edhe në ëebiste-n zyrtar, nuk është mbajtur asnjë qëndrim lidhur me këtë çështje.
Që prej datës 30 shtator, në Facebook-un e bashkisë nuk ka asnjë postim zyrtar, duke mos reaguar as për këtë ngjarje e duke mos mbajtur asnjë qëndrim.
Kryetari i Bashkisë, Tonin Marinaj, nuk ka dalë të mbajë një qëndrim për këtë çështje dhe për vartësin e tij. Bashkia nuk është kujtuar minimalisht të hapë hetim të brendshëm në lidhje me administratën e saj, për punonjësit dhe sjelljen e tyre, lëre pastaj për të parandaluar sjelljet abuzive të atyre që veshin uniformën shtetërore dhe e shfrytëzojnë këtë post për t’i rënë në qafë qyterarëve për përfitime të vetat personale.
/GazetaReforma.com/
