Në 24 orët e fundit, në Itali janë regjistruar nga 174,398 teste të kryera, 21,994 raste të reja me koronavirus. Autoritetet konfirmuan se brenda ditës, kanë ndërruar jetë edhe 221 qytetarë të prekur nga Covid-19.
Rajoni me numrin më të lartë të të infektuarve është Lombardia ku u regjistruan 5,035 raste të reja, e ndjekur nga Piemonte (2,458).
Në këto kushte, qeveria italiane ka zbatuar mbylljen e pjesshme. Kjo ka shkaktuar zemërimin e tregtarëve dhe pronarëve të palestrave të penalizuar nga vendimi i Këshillit të Ministrave.
Protestat në të gjithë Italinë u shtuan pas shtrëngimit të fundit të masave të qeverisë, që ndalon lokalet pas orës 18:00 dhe ndalimin e palestrave dhe aktiviteteve sportive.
Mijëra vetë kanë dalë në shesh nga Milano, në Napoli, Palermo, Torino dhe Romë duke plaçkitur dyqane për të kundërshtuar vendimet e qeverisë për masat anti-Covid, ndërsa disa persona kanë mbetur të plagosur gjatë incidenteve mes demonstruesve dhe policisë. Autorët e trazirave thuhet se janë më së shumti të rinj.
Shoferët e taksive në Torino pushtuan piazza Castello, pronarët e restoranteve në Kremonë hodhën tenxhere përpara prefekturës dhe më pas i lanë në tokë si në një varrezë enësh. Në Catania, ata hodhën bomba letre para prefekturës, në Treviso parakaluan në procesion, në Viareggio të rinjtë bllokuan trafikun dhe hodhën bomba tymi dhe fishekzjarrë. Gjithashtu, plaçkitje dhe vjedhje të dyqaneve Louis Vitton dhe Gucci u raportuan në Torino dhe Romë.
Ministria e Brendshme, në Itali, ka ngritur alarmin pas zemërimit në rritje të qytetarëve : “Çështja e rendit publik është bërë shumë e ndjeshme dhe situatat më të rrezikshme duhet të zbuten”.
Bizneset e vogla pretendojnë se ende nuk e kanë marrë veten nga kufizimet e mëparshme dhe se masat e reja do t’i çojnë në prag të falimentimit. Sipas urdhrit të ri, në fuqi deri në 24 nëntor, restorantet, baret dhe kafenetë duhet të ndalin shërbimin në tryezë në orën 18 të pasdites e të ofrojnë vetëm shërbimin take aëay deri në mesnatë. Sportet e kontaktit janë të ndaluara, dyqanet dhe shumica e bizneseve do të qëndrojnë të mbyllura.
Kufizimet parashikojnë gjithashtu që 75 përqind e klasave në shkollat e mesme dhe universitete të zhvillohen online. Sipas mediave italiane, qeveritë rajonale kanë kërkuar që mësimi të kalojë plotësisht në distancë, por një lëvizje e tillë është kundërshtuar nga ministrja e arsimit Lucia Azzolina.
/GazetaReforma.com/
