Shpresat e italianëve u ringjallën sërish, pasi një ditë para lirimit të masave përtej Adriatikut u shënua bilanci më i ulët prej 10 marsit, pasi u regjistruan 195 të vdekur.
Dje për herë të parë numri i personave aktivë me koronavirus(91,528) ishte më i vogël se ai i të shëruarve (93,245).
Ditën e sotme autoritetet italiane kanë bërë me dije se gjatë 24 orëve të fundit janë regjistruar 274 viktima dhe 1,401 raste të reja, duke e çuar numrin e përgjithshëm të viktimave në 29,958 dhe numrin e personave të infektuar në 215,858.
Deri më tani rezultojnë 96,275 pacientë të shëruar nga Covid-19, pasi sot kanë fituar betejën e tyre me Covid-19 edhe 3,030 pacientë.
Në repartet e terapisë intesive në 24 orët e fundit janë regjistruar 22 pacientë më pak, teksa në rajonin e Lombardisë sot janë regjistruar 720 raste pozitive dhe 164 viktima.
Deri më tani në Itali janë kryer 2,381,288 tampone.
Qeveria Conte ka komunikuar se ditët e para të kësaj faze janë pozitive e qytetarët italianë kanë treguar sens të lartë përgjegjësie e respektimi në rregullat e distancimit social.
“Nëse dhe kurba e pandemisë do të na e lejoj, shumë sektorë të ekonomisë që janë të mbyllura mund të hapen para datës së përcaktuar”, ka thënë për mediat kryeministri Giuseppe Conte.
