Një ngjarje tronditëse ka tronditur komunitetin e Montecilfone-s në Itali, ku mbrëmjen e 28 prillit është gjetur pa jetë një grua 27-vjeçare me origjinë shqiptare, nënë e një fëmije të vogël. Trupi i saj u zbulua i lidhur në një pemë pranë “Ura e Sherifit”, përgjatë rrugës që lidh Larinon me zonën e Biferninës.
Prokuroria Publike e Larinos ka hapur një hetim zyrtar për të zbardhur rrethanat e vdekjes, ndërsa autopsia mbi trupin e saj është caktuar për të premten, më 2 maj. Për momentin, autoritetet nuk kanë vendosur asnjë person nën akuzë.
Ish-bashkëshorti i saj, 51-vjeç, ishte i pari që ngriti alarmin, i shqetësuar se mos ajo mund të kryente ndonjë akt ekstrem. Pasi nuk arriti ta gjente, kërkoi ndihmë dhe bashkë me karabinierët u drejtua në zonën ku më pas u bë zbulimi tragjik. Forcat e rendit konstatuan menjëherë vdekjen e saj.
Burri u mor në pyetje gjatë në kazermë dhe dha versionin e tij të ngjarjeve, ndërsa hetuesit po ruajnë konfidencialitet të plotë për ecurinë e çështjes.
E ndjera jetonte vetëm me djalin e saj shtatëvjeçar, me të cilin kishte një lidhje të veçantë që përshkruhej nga të gjithë si thelbi i jetës së saj. Ajo punonte në një qendër për emigrantët dhe gëzonte respektin e komunitetit për përkushtimin dhe pozitivitetin që transmetonte.
Montecilfone është zhytur në heshtje dhe pikëllim. Në rrjetet sociale kanë shpërthyer mesazhe dhimbjeje: “Nuk ka fjalë, pusho në paqe dhe kujdesu për të voglin tënd”, shkruan një mik. “Një vajzë që buzëqesh gjithmonë”, kujton një tjetër.
E vërteta mbi vdekjen e saj mbetet ende e paqartë, në pritje të rezultateve të autopsisë dhe hetimeve të mëtejshme.
